Category Archives: কবিতা

চহা কবিতা – চামচুল হক

কিছুমানে গঢ়ে, কিছুমানে ভাঙে
কিছুমানে হাঁহে, কিছুমানে কান্দে
কিছুমানে দূৰৈৰ পৰাই চাই থাকে
চাই চাই হাততালি দিয়ে
যেন খেলুৱৈৰ ফুটবল
ঢোপখেলৰ ঢোপ

কিছুমানে বোকা ছটিয়াই
বোকা-ভাওনাতে ৰঙ পায়
কিছুমানে জিকে
আন কিছুমানৰ কণ-কঠীয়া মৰে

জিকাই
জিকক
মৰাই
মৰক
কাক মাৰি কোনে খায়
নিজ সিদ্ধি মাথোঁ সাৰ
কাৰ কথা কোনে শুনে
সময় নোলায় আনৰ বাবে

জনে জনে মত
জনে জনে কথা
জনে জনে বিশ্বাস
জনে জনে বিৰাগ
এজন হ’ল ধোঁৱা তুলসীৰ পাত
আনজন বোলে সাত শতৰুৰ জাত
কাৰোবাৰ আকাশত পূৰ্ণিমা
আন কাৰোবাৰ ঘোৰ অমানিশা
তথাপি পানীয়েই সখী পিপৰাৰ
পানীতেই জীৱন৷

%d bloggers like this: